مايسه سليم ،في دروب الحياة 11

بقلم ✍️_ مايسة سليم

    هو البعد عن الناس غنيمه ولا معرفة الناس كنوز

انتشرت جدا هذه المقولة واخدت وقت طويل في الجدال مابين هو معرفة الناس كنوز ،ولا البعد عنهم غنيمة 🤔

في حقيقة الأمر كلاهما صحيح نعم معرفة الناس كنوز لأنها جوهر العلاقات ومنشأ الترابط والصلات ” وجعلناكم شعوبا وقبائل لتعارفوا ” معرفة الناس والتواصل معهم شئ جميل ونتائجه بتكون لها مردود إيجابي على شخصية الإنسان بصفة خاصة و المجمتع بشكل عام

لكن ما أريد قوله؛ ان هناك فرق شاسع بين إنسان تجهل من هو وآخر تعرفه لكن تبتعد عنه.
فمعرفة الناس شئ والابتعاد عنهم شئ اخر

فـ من خلال تعاملك مع الناس ومعرفتك بيهم هتقدر تميز بين الكويس والوحش وفي كل الأحوال الاتنين بيكونوا كنز ..!!
– هتقولي ازاي بأه ؟!
= هقولك .. يعني لولا الناس الوحشه ما كناش إغتنينا .!!

جرب كدا تتعامل مع شخص تعرفه و آخر لا تعرفه في أي مشكله أو أي معاملة وقتها هتعرف الفرق بين الاثنين .

معرفة الناس الحلوة ولاد الأصول اللي بتدي طاقة إيجابية الذوق ف المعاملة اللي تخليك مبسوط انك عرفتها اللي لما تميل أو تقع بتدور عليهم تلاقيهم . اللي بتجبر بخاطرك لو بكلمه اللي بتقدرك اللي بتفتخر قدام الناس انك تعرفهم دول فعلا معرفتهم كنوز

أما النوع التاني قليل الأصل المتردد اللي هو معاك انهاردة وبعد يوم بقي ضدك اللي يخذلك ويضربك في ظهرك ووقت الشدة بيطير هوا .. دول لازم تبعد عنهم وفورا

خلاصة الكلام ؛
كل ما تكبر كل ما كلامك هايقل
وكل ماتتعامل مع ناس كل ما هاتعرف تميز اللي قدامك
وكل ما تتخذل كل ما تتعلم ان بعد ربنا ماتروحش لحد
وكل ما هاتفهم كل ما هتوفر على نفسك العتاب
الحياة باختصار شديد ما هي إلا مواقف لو ماتعلمتش منها هاتفضل تاخد على دماغك العمر كله

ماتقاطعش الناس لكن ادي لكل شخص حجم الإهتمام اللي يستاهله

الناس فعلا كنوز … . في قربهم وفي بعدهم
المهم أن شخصيتنا تكون واعيه كفاية في تحديد المسافة عنهم او إليهم

وللدروب بقيه ……