في دروب الحياة 13 بقلم مايسه سليم

بقلم ✍️ مايسة سليم 

مين فينا مااتغيرش

اتغيرت كده ليه ؟!! ؟. سؤال بتتسئله كتير
كلنا بنتغير من غير ما نحس..
من غير ما نرتّب !!
كلنا بنتغير سِنه سِنه ..و حِتة حِتة ..

يمكن عشان اكتشفنا كل حاجة علي حقيقتها
و مبقناش هبل و بيتضحك علي عقلنا زي زمان
أكيد عشان نضجنا و كبرنا و عشان الايام و المواقف اللي عشناها محدش بيعلم زيهم !
يمكن عشان اتكسرت حاجة جوانا فقويت جوانا حاجات تانيه
يمكن عشان وقعنا كذا مرة و محدش مد إيده يقومنا ..!
يمكن عشان الدنيا طلعت قاسية علينا اكتر ما كنا متخيلين
يمكن عشان بنتحمل فوق طاقتنا ..
يمكن عشان المسئوليات قطمت وسطنا ..
يمكن عشان اللي حولينا نفسهم بيتغيروا ..
يمكن عشان لقينا الحب و الاهتمام من آخر حد افتكرناه هيهتم و اقرب حد عمل نفسه مش من هنا !
حاجات كتير أثرت فينا بشكل مباشر أو غير مباشر
مين فينا ما اتغيرش !!
لو فكرت شويه هتلاقي حاجات كتير عملتها ماكنتش تتخيل إنك ممكن تعملها فى يوم من الأيام وحاجات أكتر حصلت لك عمرك ماتوقعت إنها ممكن تحصل لك وما بين دا كله صاحبت وحبيت وعرفت ناس كتير منهم إللى راح ومش راجع و منهم إللى بعد وإللى نسى وإللى إستغنى. وكل واحد من دول خد جزء منك معاه
اللي فاكر انه مش بيتغير بيضحك علي نفسه
كلنا مشاعرنا بتتضرب في الخلاط كل فترة و بتطلع كوكتيل
يا حلو و بيحلي حياتنا يا مر و بيوجعنا ..
محدش فينا بيتغير فجأة…
كل ما بنكبر بنفهم نفسنا و الدنيا و الناس فبنتغير !
طول ما إحنا بنكبر ،إحتياجاتنا بتختلف بنبعد عن اللي بيرهقنا و بيوجعنا فبنتغير !! بنرتب اولوياتنا كل شوية فبنتغير !

ده لازم يحصل عشان نقدر نعيش و نعدي كل اللي بنشوفه و نقدر نقوم و ننفض التراب من كل وقعة بنوقعها و نكمل في حياتنا عشان الحياة ما بتستناش حد و لا بتوقف علي حد .
التغيير لا مفر منه بس نتمني نتغير للأنضج والافضل .

ولدروب الحياة بقيه ……