مايسه سليم :في دروب الحياة 6

بقلم ✍️ مايسة سليم               كنزك الحقيقي في الزمن دا بالذات هو شخص ما يخذلكش ، شخص بينك و بينه نوع من الإتصال الروحي .تلاقي نفسك بتتكلم معاه في كل حاجة من غير أي تفكير ، تلجأ له لما الدنيا تضيق بيك وأنت واثق إن عمره ما هيخيب ظنك .

شخص تقدر تتكلم معاه و تحكيله جميع مشاكلك ، و كل حاجه بتقلقك ولو فضلت تحكي ساعتين تلاته هتلاقيه بيسمعك من غير ما يزهق أو يمل منك . وحتى لو أسأت سرد الأحداث و حكيت بشكل فوضوي و غير مرتب ، تلاقيه بردو فاهمك ، عشان هو مركز معاك أوي لدرجة أنه قدر يربط كل الأحداث و عرف يرتبها

بالبلدي كده شخص التعامل معاه مُريح لا بتحتاج تبرر كلامك ، ولا بيقف لك على الواحدة ويخليك تفكر في الكلمة 100 مرة قبل ما تقولها ، شخص تتعامل معاه بكل تلقائية و شفافية .

الشخص دا لما تلاقيه !!! .. إمسك فيه أوي و أوعا تسيبه من إيدك . علشان لو خسرته هتلاقي نفسك ضايع ، و وحيد من غيره ، حتي لو حواليك العالم كله هتكون عايزه هو ومحتاجه هو ومفيش بديل ولا غنى عنه ..!

إمسكوا في الناس اللي بتيجي تسأل ، وتستفهم ، وعايزين يعرفوا قصدكم ، من غير ما يسيبوا فرصة لسوء الظن والشيطان يدخل ما بينكم ، الناس دي باقية وشاريه وعايزة تفهم، لإنهم لو مش باقيين عليكم هيُقفوا على الواحدة ، وهيمسكوا في الكلمة ، ويعملوا منها ألف حوار ويكبروا الموضوع ، لكن اللي بيحاول يعرف قصدك قبل ما يحكم عليك دا شخص باقي و شاري أوي .

والفترة دي بالتحديد محتاجة ناس تهوّن علينا وتزُق معانا الأيام مش ناس غاوية تصعبها ، وتكلكع كُل حاجة اكتر ماهي مكلكعة . محتاجين في حياتنا ناس حلوة تشبه روحنا وقلبنا .
محتاجين ناس تطبطب علينا مش بايدها بقلبها واحساسها بينا . محتاجين ناس تحول يومنا ١٨٠ درجة بمجرد بس ما نبص في وشهم او حتي نكلمهم .

محتاجين حد يمسح همومنا بأستيكة كأنها محصلتش .
محتاجين ناس لا تعاتب ولا تلوم ولا تتهم ولا توجع قلبنا .
محتاجين ناس تسمعنا من غير ما تقطعنا نتكلم في حضنها نعيط ,نصوت ,نخرج كل الكبت اللي جوانا معاهم من غير ما يزهقوا ولا نسمع كلمه معلش منهم لمجرد المواساه .
محتاجين ناس تفهمنا من نظرة عنينا من ضحكتنا البهتانه اللي مخبية وراها وجع الدنيا ودموع العالم .بتشوفنا من جوه من غير ما نتكلم . واما نتكلم ناخد راحتنا وعارفين اننا بنتكلم مع نفسنا وان كلامنا اترمي في بير ملوش قرار .
محتاجين ناس لو كلمناهم واحنا زعلانين تقدر وتستوعب اننا مش وحشين بس مضغوطين وغصب عننا ، ومنبررش ليهم لاننا عارفين انهم هيسامحونا وهيحتونا .

محتاجين ناس بسيطة تبسط كل حاجة لينا وتحسسنا ان الدنيا بخير . محتاجين ناس جدعة تكون في ضهرنا سند .
واثقين ومتأكدين ان لينا غلاوة عندهم ومش محتاجين نخبي عيوبنا ، ولا نظهر بحاجة مش فينا .
احنا حقيقي محتاجين يكون في حياتنا ناس زي دي
ناس تكون لينا الدفا والأمان والحب .
ناس تكون شويه ميه في صحرا و احنا ميتين من العطش تروينا . ناس تكون غطا لينا في عز الشتا .
ناس تكون حته سكر بعد علاج مر .
ناس حلوة وصحبتها أحلي

وللدروب بقيه …