في دروب الحياة.. بقلم مايسه سليم
في دروب الحياة..2..
بقلم ✍️_ مايسة سليم
مين فينا ما يتمناش إنه يغير من حياته ، ويفوز بفرصة بداية جديدة ، سواء فى مجال شغله أو علاقاته أو أموره الحياتية.
مين فينا ما مرش بفترات إحباط حس وقتها باليأس ، وعدم القدرة على استكمال حياته بصورة طبيعية .
مين فينا ما رسمش خطوات وخطط لمستقبله ولسبب أو لآخر فقد شغفه لتحقيقها .
مين فينا ما تعرضش للحظات تخبط و إحساس مشوش في مشوار حياته .
مين فينا ما اخدش قرار انه يقفل كل الصفحات القديمة الباهتة و يفكر بجديه فى فتح صفحة جديدة في حياته ، مين … و مين ….. !!كلنا فكرنا و بنفكر لكن وقت التنفيذ بنقف محلك سر ، ما بنقدرش ناخد الخطوة بشكل جدي ، ولما نسأل ليه وايه السبب مابتعرفش ترد… ….عارف ليه ؟!! عشان بيكون مسيطر عليك ضعفك وعدم ثقتك بنفسك واحساسك الدائم بسوء الحظ ، و الخوف.. أيوة الخوف !! الخوف من الفشل ، الخوف من الخسارة ، من الفقد ، من نظرة الشماته في عيون الآخرين ، ومن حاجات تانيه كتيره وطالما ان الحياة مرة واحدة ليه تضيعها بالخوف والتردد و بالاهتمام برأي الآخرين عنك؟ دايمًا بقول أن الخوف ؛ شخص جبان , ضعيف, لو سيطرت عليه هتفوز ، وهتنجح ، وهتوصل ، لهدفك وتحقق حلمك ، وفي نظري الشخص اللي بيخاف من الفشل، هو نفسه الشخص اللي بيستسلم في نص الطريق ويمكن في أوله. اياك والأستسلام لليأس والخوف من أنك تبدأ من جديد ولو هتبدأ الف مرة ، لأن مع كل بداية جديدة بتتعلم من اخطاءك،لو حسيت باليأس والاستسلام، خذ استراحة قصيرة،اتخلص فيها من جميع عاداتك السيئة،أرجع حدد أهدافك مرة ثانية حفز نفسك و نمي مهاراتك ، اتخلص من أفكارك السلبية اللي بتراودك ، استمر في المحاولة مرة واتنين وتلاته… خليك فاهم أنت ما بتبدأش من نقطة الصفر زي مانت فاكر لأ أنت بتبدأ من نقطة الخبرة التي اكتسبتها من تجاربك ومحاولاتك الماضية ..مهما تعثرت أنهض ، وحاول من جديد، تعثرك ووقوعك في المرة الأولى لا يعني انك فشلت ، الفشل الحقيقي هو انك تستسلم للهزيمة وتتخلي عن حلمك وطموحك. وثق .. ان الحياة بتتعامل معاك على حسب نظرتك ليها لو نظرت للحياة بجدية وصعوبة هتجلب ليك ظروف وحياة صعبة تليق بنظرتك ليها،و لو نظرت للحياة بحب ويسر ولطف هتوفرلك ظروف كلها يسر ولطف. فالشعور الذي تعطيه للحياة يعود إليك….ما تضيعش وقت .. وأبدأ من جديد و اتحدي نفسك ، فكر بشكل إيجابي ، أعرف مواطن الضعف عندك، رتب افكارك ، حدد اخطائك ، وحاول تقويها لاكتساب مهارات جديدة ، تساعدك في إنجاح خططك ، اتغلب على مخاوفك ، ثق في قدراتك ركز على إنجازاتك الشخصية ومهاراتك ، إيمانك بالله أولا وأخيرا ثم إيمانك بنفسك ، أبعد عن الأشخاص السلبيين في حياتك وازن بين متطلباتك و احتياجاتك حط خطه لأولوياتك …… كن بطل حياتك💪
واعلم جيدا أننا جميعاً علينا السعي أما التوفيق ف بيد الله . ولدروب الحياة بقية ……
يجب عليك تسجيل الدخول لكتابة تعليق.