في دروب الحياة… 8.اتعلم تقول لأ

بقلم ✍️ _ مايسة سليم

أغلب ضغوطاتك النفسية ، ووقتك الضايع ، وسحلتك علي الفاضي ، هتلاقي سببها إنك ماتقدرش تقول ” لأ ” في مواقف كان لازم تقف عليها وتاخد فيها موقف و تقول “لأ” .

جايز بتبقي خايف تحرج اللي قدامك ، وإنه عشمان فيك ، فتأذي نفسك لمجرد أنك مش عايز تحرجه . أو أنك خايف من خسارة شخص ما ، أتعود أنك تقوله حاضر علي أي حاجة حتي و لو علي غير رغبتك خوفاً من زعله .

في ناس كده أما تفضل تيجي علي نفسك علشانهم، بيتعاملوا معاك علي أساس إن دا حق مكتسب بالنسبة ليهم، مش أنه تفٌضل منك ، لا وكمان مش من حقك ترحم نفسك علشانهم ،لا ده لازم تفضل مسحول ، ومُستغل بدون إعتراض .

العلاقات والناس دي بجد بتبقي مُهلكة جداً ، وخسارتها مكسب ليك علي المدي الطويل ، ومع الوقت هتكتشف إنك كنت ظالم نفسك وأنك ارهقتها فوق طاقتها 

فـ لو القعدة وحشة.. قوم

لو المكالمة اللي جاية لك هضيقك وهتوجعك.. ما تردش !

لو المشوار مش عاجبك ومش مرتاح.له . ماتروحش !

لو حسيت أنك بتعافر لوحدك في علاقة مش صحية خالص وبتألمك وبتستنفزك وبتهلكك وتنهك قواك.. امشي !

من الآخر…

أنت مش مجبر أنك تتأقلم على وضع أنت مش عايزه أو تيجي على نفسك وتفرض عليها حاجات أنت مش حاببها ، و مش مرتاح فيها..

و تاني ” لأ ” لازم تتعلم تقولها هي ” لأ ” للفرص الغير مناسبة مش شرط كل حاجة بتلمع، تكون مناسبة ليك 

في ناس كتير كانت حياتهم مستقرة لحد ما جت فرصة مفكروش فيها هل هي مناسبة ليهم ولا لأ لكن لمجرد إنها فرصة لُقطة ماتتعوضش جريوا عليها

ياما ناس كتيرة جريوا ورا شغلانة كانت السبب في دمار مستقبلهم ونفسيتهم , وعلاقاتهم باللي حواليهم . وممكن يكون جريوا ورا زواج, تجارة , عربية, كورسات, فرص شغل ، فرص كتير مكانتش مناسبة ليهم ، لكن لمجرد إنها “فرصة ماتتعوضش” وخوفهم إنها ممكن تضيع منهم خلاهم يجروا عليها بدون ما يفكروا و من غير ما يحسبوها و يشوفوا هي مناسبة ليهم ولظروفهم فعلاً ولا لأ

– هتقولي يعني انتي عايزاني أقول لأ علي الفاضي والمليان !!

= لا خالص … عايزاك تتعلم إمتي تقول توافق وتقول نعم و أمتي ترفض و تقول لأ ، لإنه أذي ليك وغير مناسبة لظروفك أو إمكانياتك 

عايزاك تقول لأ والف لأ للشغل اللي بياخد منك مجهود من غير مقابل مادي ولا معنوي.

 لأ لأي شخص يستغلك علشان أنت لسة في بداية طريقك .

 لأ للمدير اللي بيدمر نفسيتك ويجرحك بالكلام تحت مبرر أنه بيعلمك .

 لأ للشركة اللي كلها إستغلال وفيها نصب ممكن يدمرك .

 لأ للأشخاص المادية اللي مش بتقدر مجهودك ولا بترفع معنوياتك ولا مقدرة تعبك..

اتعلم تقول لأ … علشان اللي بيسكت مرة بيكون مجبور يسكت خمسين مرة 👌

ولدروب الحياة بقية…..