في دروب الحياة .. 4..بقلم مايسه سليم

بقلم ✍️_ مايسة سليم

    ما تكتموش في قلبكم يا جماعة ..
فضفضوا مع نفسكم أحكوا و عبروا عن اللي حاسين بيه، خرجوا مشاعركم – ما بتكلمش عن مشاعر الحب فقط لكن عن أي مشاعر جواكم من حزن ,غضب,عتاب, وجع أو ندم – طلعوا غضبكم علي الورق .
في منا ناس تقدر تتكلم وتعبر عن أحاسيسها بدون خوف وبمنتهى الشجاعة لكن علي الجانب الآخر ناس كتير اتربت على كبت مشاعرها ما عندهاش القدرة ولا الجرأة تطلع اللي جواها ، يمكن خجل من البوح أو خوفاً من المواجهة أو يمكن لأنهم ماتعلموش إزاي يوصفوا مشاعرهم،أو يعبروا عنها أصلاً

فضفضوا بأي طريقة تعجبكم ؛ بعشوائية, بتلقائية، بالطريقة و بالإسلوب اللي يخطر علي بالكم حتي لو من غير ترتيب !!
لا الورقة ،ولا القلم هيعترضوا !! … بالعكس ،هيتقبلوا كلامكم زي ما هو 👌 علي الأقل هيطلع من جواكم من غير كذب ولا كسوف ولا تزييف !! ،

اتعلموا تكتبوا كل أحاسيسكم ….
الكتابة هتسهل عليك تفهم نفسك و إزاي تتعامل معاها ومع مشاكلك مجرد إنك تخرج الإحساس اللي جواك علي الورق أنت كدا بتخرج معاه الوجع المتسبب في إحساسك بالخنقة و الألم والحزن .

اوعا تستهون بفكرة إنك تكتب وتسجل كل حاجه مضيقاك صدقني و عن تجربة بيكون ليها تأثير كبير جدآ علي نفسيتك لأنك وقتها بتخرج طاقة الغضب والتوتر والخوف اللي جواك واللي يمكن يكون صعب تحكيها لاي حد لأنك جايز ماتعرفش تعبر عن الكلام اللي عايز تقوله ، أو يمكن تخاف تتفهم غلط من طريقة تعبيرك عن حزنك أو غضبك، او إنك تحس بإحراج لما تكشف ضعفك قدام حد .

الفضفضة علي الورق ؛ بتخفف الضغوط اللي جواك ، وبتفرغ شحنة غضبك ، قلقك ، توترك ، ووجعك وكل طاقاتك السلبية وكتير من الحاجات المكبوتة والمخزونة جوه قلبك .
مش جايز بالفضفضة دي تعرف تخرج من كبوتك وخنقتك وده لانك قدرت تفهم نفسك ومشاعرك وعرفت ايه اللي مضايقك ومكدر حياتك .. وزي ما قالوا زمان “إذا عرف السبب بطل العجب” و تكون دي أول خطوة لحل مشكلتك وساعتها تعرف تبدأ منين حلها !!

الفضفضة علي الورق افضل بكتير ما تفضفض لشخص وتعري نفسك قدامه ،وبمرور الوقت ممكن تندم إنك اتكلمت و بعبعت معاه 🙄

يا سيدي أكتب و فضفض براحتك وبعدين أقطع الورقة أو ولع فيها حتي 😄 !! اللي يهمني في الموضوع انك تخرج اللي جواك وترتاح بأي شكل كان …

فضفض بدل ما احاسيسك دي تفضل تتسرسب لخلية خلية من جسمك و تدمرها نفسياً وعضوياً !! وبدال ماتحتاج طبيب نفسي يعالجك . هتحتاج طبيب نفسي وعضوي كمان..
وانت اصلا مش ناقص كع فلوس 🙆

هي بسيطة و سهلة و نتيجتها عظيمة بجد

جربوها و ادعوا لي 😁

………… وللدروب بقيه